Yon enfimyè nan peyi Almay akize poutèt li mete dlo sèl nan sereng vaksen Pfizer bay moun
Yon enfimyè lakwa wouj nan peyi Almay gen akizasyon ki tonbe sou tèt li kòmkwa li ta mete dlo sale nan sereng vaksen Pfizer pou l bay moun, selon sa medya alman der Tagesspiegel revele epi releye pa sit Yahoo.com
Anviwon 8 600 moun nan Nò peyi Almay arive pran vye dòz dlo sale sa. Sa ki fè otorite konsène ki t ap sansibilize yo pou yo vaksinen refè apèl ak tout moun sa yo pou vin pran yon nouvèl dòz vaksen paske pa enfimyè a pa bon.
Aksyon sa pase nan yon sant vaksinasyon nan peyi Almay ki pote non Schortens-Roffhausen. « Mwen totalman choke pa ensidan sa », se sa Sven Ambrosy ki se administratè awondisman kote sa fèt la poste sou paj Facebook li.
8 600 moun sa yo ki resevwa dlo sèl la, majorite ladan yo gen 70 an, yo resevwa dòz la nan men enfimyè a epòk vaksen an te pou moun ki nan laj sa yo, epòk mas ak avril.
Selon polisye ki sou ankèt la, yo poko ka defini rezon ki ta pouse enfimyè a fè sa. Men plizyè piblikasyon enfimyè a ke non l pa devwale te konn mete an dout koze vaksen kont kowonaviris la.
Zòn kote sa fèt la ki se awondisman Frise, otorite yo fè konnen y ap fè tout posib yo pou moun ki te pran dlo sèl nan plas vaksen Pfizer a vaksinen rapid.
Selon dènye chif ministè sante nan peyi Almay mete deyò 52,1 milyon alman resevwa premye dòz vaksen yo a, sa vle di 62,7% popilasyon an vaksinen.
Dekouvri plis:
