Anderson Joseph nan men kidnapè depi madi pase a, ravisè yo mande yon gwo sòm lajan pou libere l.
Anderson Joseph se non yon jèn gason ki sibi zak kidnapin. Aksyon sa pase madi swa, nan Santo 17, nan Lilavwa. Daprè yon pwòch Anderson Joseph, li sibi zak kidnapin lan nan moman li genlè ta pral depoze Naïza Fadianie Saint Germain lakay li selon sa l di.
Naïza Fadianie Saint Germain kidnape tou depi madi swa nan menm zòn lan. Se Rezon ki ta pouse pwòch Anderson Joseph la di yo kidnape misye ansanm ak Fadianie Saint Germain
« Yo anlve l madi swa pandan li genlè pral depoze Naïza lakay li paske se devan enpas kay Naïza yo voye nou al chache machin li. Se aprè n ap vin aprann li te akonpaye de yon demwazèl, nou pa t janm konn sa », daprè sa pwòch viktim lan deklare.
Ravisè yo mande yon gwo sòm lajan ke pwòch la mande ak redaksyon jounal la pou pa rann piblik epi fè konnen menm lè yo ta fè yon mwa y ap kolekte yo p ap ka fin fè kantite kòb ravisè yo mande a. Koyensidans ki gen nan sa, menm jan kidnapè yo te bay fanmi Naïza Fadianie Saint Germain midi jodia kòm ultimatum pou pote lajan an, se menm bagay la yo di ak fanmi Anderson Joseph tou.
Daprè pwòch Anderson Joseph la, depi lè ultimatum midi an te fin pase jodia, ravisè yo poko rele yo epi l fè l konnen se sou telefòn Anderson lan yo kontakte fanmi an epi depi yo fin pale yo fèmen san yo pa pa janm pale ak otaj la.
Pwòch sa menm jan ak pwòch Naïza Fadianie Saint Germain ap mande liberasyon Anderson Joseph.
Dekouvri plis:
