Mèt André Michel ki se pòt pawòl SDP deklare moun k ap frape l yo pa fouti gouye plim sou do l paske l pa gen move dosye.
Depi aprè lanmò Jovenel Moïse 7 jiyè pase rive jis nan akò politik 11 septanm lan kote SDP fè pati akò sa a, anpil moun pa sispann kritike Sektè Demokratik la pou pozisyon epi choute sou mèt André Michel ki toujou ap pale nan non Sektè a. Nan sans sa, avoka militan an soti nan silans atravè yon mesaj sou kont Facebook li pou l di moun k ap frape l depi 7 mwa yo poze, yo pa fouti gouye plim sou do l.
Opozan fawouch rejim PHTK a konsyan gen anpil atak l ap sibi chak jou ki jou. Nan koumansman mesaj la, li fè konnen malgre frap sa yo, yo pa fouti jwenn yon dosye sou li. « Mwen pa konn touye moun. Mwen pa t janm nan dwòg, mwen pa janm nan koripsyon. Mwen pa gen okenn move dosye ». Pou avoka a, moun sa yo se tan y ap pèdi paske li ajoute pou l di: « pa gen bagay serye yo ka di sou mwen ».
Mèt la kontinye pou l di li pa fè anyen ki pa sa nan peyi a. Mèt André Michel vante tèt li pou l kalifye l kòm yon moun ki pwòp, ki pa nan krim epi souliye li pa gen lajan Leta nan men li.
Ansyen kandida pou pòs prezidan an voye yon piga bay moun li estime ki se detraktè k ap frape l depi 7 mwa pou l di yo atansyon, pito yo poze, li konn tout dosye yo. « Mwen konnen yo nan dwòg. Mwen konnen yo konn touye moun. Yo gen anpil vye dosye sou do yo. Mwen vle di yo poze. Poze! Poze! Poze! »
Anndan mesaj sa, André Michel avèti moun sa yo l ap pale ak yo si yo pa poze. San fè okenn pèsonalite, li fè konnen moun sa yo se ansyen kanmarad konba li paske yo te konn kanpe nan menm ekip ak li.
André Michel raple ak moun sa yo li gen avantaj pa gen okenn dosye, li konnen dosye yo epi li pq janm pè moun sou latè menm si li respekte anpil moun. Pandan l fini pou l di yo, lè l ap deside atake se pa moun y ap voye devan yo l ap pase pran, se konsène yo dirèkteman.
Photo: Ody Bien-Eugène | Juno7
Dekouvri plis:
Le taux de référence calculé par la BRH pour ce samedi 15 janvier 2022
