Yon ensidan ki mete fas pou fas sekirite minis Mathias Pierre ak Jetry Dumont, fè sitwayen an pase 3 zè nan komisarya Petyonvil
Tout sa rive paske sitwayen an – PDG medya nimerik Ayibopost la – pat deside bay kòtèj minis « responsab eleksyon yo » pase paske l te vyole règ sikilasyon yo nan blòk restoran Muncheez samdi 23 janvye a. Pou rakonte sa k pase a, Jetry Dumont ekri yon tèks kote l trete minis Mathias Pierre « enbesil ».
« M sot pase 3 zè d tan nan komisarya Petion-Ville paske « Minis » Mathias Pierre se yon enbesil! », se sa nou li nan premye fraz tèks pwopriyetè Ayibopost la ekri a.
« Apre petèt yon 30 segond klaksonnen ak ti son chèf yo renmen anpil lan, mwen pa deplase. 2 polisye ak gwo zam desann ak anpil agresivite ak zam nan men yo. M rete kalm malgre anndanm ap bouyi. Mwen di sa k vin pale avè m lan yon pawòl ki ale nan sans sa a « Patizan se pa ou m pa respekte, se nèg w ap akonpanye k ap fè w fè makak la »,si n dwe kwè mesye Dumont ki presize se sans inik kòtèj minis la t ap pran nan moman ensidan an rive a.
Aprè anpil menas lanmò, polisye ak lòt nèg ak zam ki te nan kòtèj la te mennen Jetry nan komisarya Petyonvil la daprè sa li eksplike nan tèks li a ki chaje ak emosyon paske yo rache epi ale ak plak machin li, fè l pèditan l pandan y ap vyole dwa l kòm sitwayen elatriye.
« Apre yon pakèt virewon nan komisarya, yo lage m. Paske m se pwopriyetè medya, paske m se pitit senatè… paske yo wè avoka m debake rapidman… Gen anpil « paske ». M sèten si pa t gen tout « paske » sa yo m t ap nan prizon toujou poutèt yon Minis yo apèn nome ki pap regle anyen te bezwen al nan yo lotèl prese prese », daprè Jetry ki pran polisye yo kòm viktim tou. Nan tèks li a, li mete an kesyon fòmasyom polisye yo resevwa en akademi polis la.
« Men yo sitou viktim paske gen yon arivis san kolòn vètebral – ki swaf pouvwa, ki sa pa gen 2 semèn te nan « opozisyon » e ki rapidman chanje kan pou l ka gen ti sirèn ak lapolis k ap akonpanye l nenpòt kote l prale – bezwen santi l « chèf ». Paske san ti privilèj sa yo li pa santi l moun. Polisye yo viktim, men yo pa timoun », toujou deprè Jetry Dumont ki nan pati sa a, ap fè alizyon ak minis Mathias Pierre.
Dekouvri plis:
Le RNDDH accuse le président et son équipe de créer un climat de violence dans le pays
