Enstiti Duartiano nan Repiblik Dominikèn mande pou fwontyè ki separe Ayiti ak Repiblik Dominikèn lan toujou rete fèmen.
Prezidan enstiti Duartiano a, Wilson Gómez Ramírez mande ak prezidan Luis Abinader epi otorite dominiken ki anchaje politik entènasyonal pou toujou kenbe fwontyè a fèmen jiskaske Ayiti estabilize avèk otorite lejitim ki pa reprezante yon danje pou souverènte peyi l, daprè sa jounal dominiken Diaro Libre rapòte yè lendi 12 jiyè a.
Dirijan enstiti Duartiano a te kontinye pou l di reyouvèti fwontyè a dwe fèt tou sou sipèvizyon ministè sante piblik dominiken ki dwe asire l kowonaviris nan zòn fwontyè a metrize, li pa reprezante yon danje pou sante dominiken yo.
Wikenn pase a yon gwoup komèsan dominiken te pwopoze ak gouvènman yo an pou relouvri fwontyè a paske yo estime ka gen yon mank manje an Ayiti parapò ak komèsan ayisyen k ap rele yo di yo machandiz yo fini.
Sou fwontyè a, li pa etonan pou pyès moun ke 90 jiska 98 % kliyan dominiken yo se ayisyen ki ale achte machandiz yo vin vann sou bout tè papa Desalin lan. Se konsa tou, Ayiti lage vant li sou kont peyi vwazen nan ale achte tout kalte pwodui epi inyore pwodiksyon pa l.
Fwontyè a fèmen depi 7 jiyè nan maten swit ak lanmò prezidan repiblik la Jovenel Moïse. Se prezidan Luis Abinader ki te pran desizyon sa, yon desizyon ki pa san konsekans kit bò kote komèsan dominiken oubyen ayisyen.
Credit: Diaro Libre
