Granm maten mèkredi 28 avril 2021 an, popilasyon nan zòn Ravin Pentad bloke wout Lali pou pwoteste kont kidnapin ki fèt sou sitwayen Manuel Gaston Orival, ki se responsab konpayi sekirite Alternative ki nan Riyèl Vaillant.
Selon tout dènye enfo nou arive rekeyi anba bouch abitan zòn lan, fè konnen se anndan lakay li nan riyèl Nord Alexis a kote l abite yo kidnape l epi ale ak li.
Fas ak zak sa, sitwayen yo bloke wout Nord Alexis a (Ravin Pentad), boule kawotchou sou Lali devan Olympic Market, voye boutèy sou moto ak machin k ap tante pase. Lwil vide tou nan ren mòn wout Ravin Pentad la ki ale debouche sou Poupla.
Sitiyasyon sa paralize sikilasyon an, plizyè biznis oblije fèmen pòt yo sou Lali. Plizyè moun kanpe 2 bò lari a ap kòmante sa k pase a.
N ap raple w Orival se yon ansyen komisè polis. Mouvman pwotestasyon sa t ap dewoule anba je kèk polisye ki te kanpe ak inifòm anndan Ravin Pentad ap obsève fistrasyon moun yo.
Kidnapin sou Orival la se yon lòt ka ki vin ajoute sou lis moun ki ap kidnape dènye jou sa yo anndan kapital ayisyèn lan.
Fòk nou siyale tou, sou wout Bwavèna maten an, yon tantativ kidnapin sot manke fèt sou 2 elèv ki ta pral lekòl, sa ki fè abitan zòn sa fache epi bloke wout la konplètman.
Dekouvri plis:
Dansalou, yon lekòl dans Séphora Drouillard pran ak kè pou fòme plizyè jenerasyon
