Powèt Georgy Lundy ak Kevin Pierre met tèt ansanm pou fè vant siyati 2 liv pou ka ede moun komin Manich.
Powèt Georgy Lundy ki ekri liv « Degi » epi Kevin Pierre ki ekri « Mak Pye Solèy » ap fè vant siyati 2 liv sa yo samdi 28 out la, bò 3 è 30 nan aprèmidi, anndan restoran Yanvalou ki nan nimewo 48 Avni N.
Chak liv sa yo moun k ap fè deplase yo ap ka achte yo a 300 goud. Lide sa vini pou kontinye ede viktim tranbleman tè yo nan fason yo kapab, daprè eksplikasyon Kevin Pierre te bay redaksyon Juno7 la.
100% kòb k ap gen pou rantre aprè vant siyati 2 liv sa yo pral jwenn moun nan komin Manich. « Tout lajan liv ki vann yo pral jwenn yon komite moun Manich ki gen nan tèt li Stephana Dorval ki pral jere sa », daprè sa Kevin fè konnen.
Li te ajoute pou l di Stephana Dorval se moun zòn lan, li te deja ale pou konstate dega tranbleman tè a fè epi li konn kisa viktim yo plis bezwen.
Kevin Pierre di feedback yo pozitif, moun manifeste enterè pou vini nan aktivite. Si n kwè powèt la, li fè konnen gen moun ki p ap ka fè deplasman men ki ap voye achte liv yo.
Jèn powèt la envite moun yo achte liv ki ap ka ede yon moun epi deklare: « Nan sa peyi nou ye la a, se tèt ansanm ak lanmou youn pou lòt k ap sove nou ».
Dekouvri plis:
Retrait provisoire de la scène politique de Rony Colin pour des raisons de santé
