Kidnapin: Atis Money G toujou nan men kidnapè yo malgre lajan fanmi an bay.
Jean Junior Wacelus tout moun konnen sou non Money G sibi zak kidnapin depi 29 out pase a nan zòn Karade, komin Taba. Jodia fè anviwon 25 jou depi atis la toujou nan men kidnapè yo malgre yon ranson fanmi an te livre ak ravisè yo.
Aprè kidnapè yo te fin pran atis la, yo egzije ak fanmi an yon milyon dola vèt, fanmi an te fè tout sa k posib li bay 25 mil dola ameriken selon sa yon frè l te deklare sou antèn Radyo Karayib.
Endivi yo twouve sa pa ase, yo egzije yon lòt 25 mil dola ankò pou lage atis la, yon montan fanmi an pa genyen. Depi dat sa, Money G pa janm jwenn liberasyon l.
Anpil atis, animatè kiltirèl leve vwa yo sou rezo sosyal yo pou mande liberasyon atis la, pa janm gen okenn rezilta jiskaprezan.
Money G te chantè gwoup Gabel ak 5 Etwal, nan moman yo kidnape l la pa gen twòp tan li te apèn sot fè yon operasyon nan kè.
Fenomèn Kidnapin lan kontinye ap vale teren. Sa gen 2 mwa depi aprè lanmò prezidan Jovenel Moïse la tren kidnapin lan repati, li getan bote anpil moun sou wout li. Dènye li pran la se jounalis kiltirèl Frantzie Siméon, jèn kad Direksyon Nasyonal Bidjè Mackenley Mogène, ak doktè Herby Lafrance.
