Kowonaviris: aprè 28 jou nan koma, yon enfimyè reveye aprè yo fin ba l vyagra.
Mónica Almeida se non yon pòtigèz 37 lane ki reveye aprè 28 jou li te fin fè nan koma akoz maladi kowonaviris la. Selon sit Yahoo.com ak plizyè lòt medya etranje, pasyant lan te resevwa vyagra kòm tretman ki fè li arive soti nan koma.
Jèn enfimyè sa te teste pozitif nan kowonaviris 31 oktòb ki sot pase a, se yon moun ki soufri « asthme ». Malgre li te resevwa 2 dòz vaksen yo, li te pèdi gou ak odè epi ta pral krache san sou katriyèm jou li te fin teste pozitif la.
9 novanm, yo ta pral pote l lopital akoz li pa t ka respire. Yon semèn pita, yo ta pral oblije transfere l nan swen entansif. 16 novanm, medsen nan lopital konte Lincolnshire nan peyi Angletè ta pral plase l nan yon koma atifisyèl pou 28 jou, daprè jounal britanik The Sun.
Lè li ta pral reveye, se nan moman sa medsen yo ta pral revele se yon fòt doz vyagra yo te ba li nan kad tretman eksperimantal li te aksepte byen avan li te tonbe nan koma a. Medikaman an amelyore eta sante l nan sèlman yon semèn.
16 novanm li te rantre nan koma a epi soti ladan l 14 desanm ane pase. Pou li menm se yon mirak ak kado nwèl li jwenn.
Mónica Almeida gen 37 lane, li gen 2 pitit, li se yon enfimyè ki espesyalize l nan respirasyon. Li se yon pòtigèz men l ap travay nan yon lopital britanik nan konte Lincolnshire. Se nan peyi Grand Bretay aksyon sa pase tou.
Dekouvri plis:
