Kowonaviris la kontinye ap taye banda pa bò isit. Chif MSPP yo kontinye ap ogmante nan chak bilan otorite sanitè yo mete deyò.
Nan avi nimewo 417 Ministè Sante Piblik mete deyò anonse ke gen 102 nouvo ka kontaminasyon ak 5 moun ki mouri an plis nan dat 25 jen an. Chif sa yo vin ajoute sou sa k te la deja yo.
Pou kounya total la se 18 562 ka konfime, 3 088 moun pase sou kabann lopital, 425 moun mouri epi 12 842 moun trete, daprè MSPP.
Nan 102 nouvo ka kontaminasyon kowonaviris yo, depatman Lwès la devan ak 69, Latibonit vin dèyè l ak 18, Sid gen 7 nouvo ka an twazyèm pozisyon. Nò, Nòdès ak Nòdwès se twa depatman ki pa anrejistre nouvo ka kowonaviris.
Nan sa ki gen pou wè ak total moun ki mouri depi lè viris la pa bò isit, Lwès la an tèt avèk 227 moun mouri, dèyè l se Nò ki vini avèk 55, Nip se depatman ki anrejistre pi piti ka lanmò kote se 8 moun sèlman.
Jan nou mansyone l pi wo a, gen 5 nouvo ka lanmò, tout ka sa yo MSPP resanse yo nan depatman Lwès la.
Fas ak ogmantasyon ka yo, MSPP kontinye mande ak popilasyon an mete kachnen, lave men, evite bay lamen, bo ak akolad epi raple yo pou pran 3 pa distans yo ak moun.
Dekouvri plis:
Zanbi: Yon jounalis mande direksyon tele a peye l pandan l ap prezante yon jounal an dirèk
