Nan yon avi li mete deyò ki pote siyati minis doktè Marie Gréta Roy Clément, Ministè Sante Piblik ak Popilasyon (MSPP) enfòme enpòtatè ak distribitè pwodui famasi ki anrejistre yo epi mansyone pwofesyonèl sante yo tou, ke yo kapab genyen yon otorizasyon pou enpòte estòk vaksen kont kowona.
MSPP fè konnen tou anndan avi sa ke gen tout yon pwosesis pou enpòtatè, distribitè ak pwofesyonèl sante yo jwenn demann pèmi enpòtasyon an.
Pou jwenn pèmi an, ou dwe bay lis vaksen ou swete enpòte a (sa k konpoze l, prezantasyon l, kalite l, nimewo lo l, dat li ap ekspire epi laboratwa ki fè l, nan peyi li soti). Yon kopi ki sètifye ke ou otorize itilize vaksen an, sètifika otorizasyon sa se kote vaksen an soti an ki dwe bay enpòtatè a li. Orijinal sètifika analiz. Enfòmasyon sou konpozisyon ekip medikal ki chaje pou regle koze vaksinasyon an. Epi plan vaksinasyon an.
Pi lwen, MSPP fè konnen ak konsène yo li gen dwa vizite sit kote vaksinasyon yo ap fèt la epi fèmen yo si tout fwa règ sekirite pou pèsonèl ak popilasyon an pa respekte.
Ministè Sante Piblik anndan menm nòt sa pwofite remèsye enstitisyon ki bay sipò yo nan konba kont maladi a epi siyale li konte sou kolaborasyon enpòtatè konsène yo sou sa k gen pou wè ak obsèvasyon sit yo.
