Lapolis arete nan ayewopò Tucumen nan Panama 2 fanm ki gen nasyonalite kolonbyèn ki kache kokayin anba perik ki nan tèt yo.
Lapolis nan peyi Panama arete 2 fanm ki gen nasyonalite kolonbyèn ki t ap eseye pase nan ayewopò Tucumen ak kokayin nan fo cheve yo pou ale nan peyi Lespay, daprè sa jounal dominiken Diario Libre fè konnen anndan yon atik.
Selon jounal nan peyi vwazen an, vandredi pase a lapolis ta pral mete lapat nan yon premye tan sou youn nan medam yo paske kwafi ki te nan tèt li a te parèt biza ak perik la. Skanè ta pral revele gen dwòg ki kache anba perik sa. Li t ap pote anba perik sa 68 « konprime dwòg » .
Kèk èd tan aprè, Pakè nan peyi sa ta pral anonse arestasyon yon dezyèm fanm avèk 67 pakè tache nan tèt li anba perik lan.
Tou 2 medam sa yo pral devan tribinal pou akizasyon trafik entènasyonal estipefyan.
Panama se prensipal pòt kokayin ki sot nan Amerik di Sid pase pou rantre sou teritwa amerik santral la. Kolonbi se youn nan kote ki gen etikèt sou do l kòm peyi anpil trafik kokayin fèt.
Dekouvri plis :
