Moïse Jean Charles ap kontinye fè pwomosyon pwojè monè » BitGout » la nan peyi Venezyela kote li tap patisipe nan yon aktivite ak kèk lòt reprezantan nan rejyon an.
Lidè Pitit Desalin lan, Moïse Jean Charles te vwayaje pou rann li nan peyi Venezyela, vil Karakas, lendi 21 jen pase a, pou te ka ale patisipe nan yon kongrè sou 200 lanne batay Carabobo. Ansyen senatè Nò a te pwofite rankontre kèk lidè nan amerik latin lan pou pale yo de pwojè lajan elektwonik li an ki rele Bitgoud.
Nan yon videyo li fè pandan l dèyè a ki ap sikile sou rezo a, Moïse Jean Charles deklare li kontan apre reyinyon li sot fè pou Bitgoud la epi fè konnen moun ki te patisipe nan reyinyon sou Bitgoud la apre inisyativ lan.
Ansyen kandida pou pòs prezidan pa bò isit kwè ke lemonn andose lide Bit Goud la sitou moun ki soti nan peyi goch yo.
Moïse Jean Charles anndan menm videyo sa ak yon vizaj konfyan fè konnen menm sèvis lòt monè elektwonik yo bay la se li pwojè BitGoud la ap gen pou bay, yon fason pou rasire popilasyon ke l estime mizè l pral soulaje ak pwojè sa.
Ansyen majistra komin Milo a mande pèp ayisyen pou prepare l paske jan li te pwomèt li an, nan yon mwa edmi ankò li ap pare pou soti lajan elektwonik sa.
