Konpayi Nanm Solèy ak LEGB’ART mete tèt yo ansanm mwa ki sot pase a epi rann omaj ak Jacques Stephen Alexis, Dany Laferrière epi Frankétienne.
Inisyativ sa se Jean-Bernard Prinvil nan tèt kole ak Wilna Fleurimond epi Jean Caleb Naissance ki t ap kowòdone, kote te gen 3 « bustes » ki reprezante 3 gwo ekriven ayisyen sa yo. « Bustes » sa yo se travay atis Lobenson Civilma, san konte tablo penti ki te nan ekspozisyon an ki se zèv jèn atis Danaée Bien-Aimé, Emmanuel Pierre ak Lobenson Civilma tou.
Te gen 2 ekspozisyon ki te fèt nan moman omaj la kote nan Sant Kiltirèl Pye Poudre sou Boudon epi nan Alyans Fransèz nan vil Jakmèl, aktivite omaj sa te atire kiryozite anpil moun ki te vin founi je gade.
Ekspozisyon sa se yon fason tou pou mete twa ekriven sa yo devan, mete plis pwojektè sou yo, selon eksplikasyon Jean-Bernard Prinvil.
Yon lòt ekspozisyon te fèt nan Ench nan bibliyotèk minisipal vil sa, men akoz kowona epi lòt sitiyasyon, òganizatè yo deside anile kloti a ki te dwe fèt nan Fakilte IERAH epi ap reflechi sou yon lòt dat.
Nan moman ekspozisyon sa yo, estrikti yo te deside fè atelye penti ak timoun yo nan Sant Kiltirèl Pye Poudre, lekòl Art Timoun epi yon atelye espesyal te getan fèt nan vil Ench tou. Atelye sa pa t fèt jakmèl malgre te gen ekspozisyon ladan l.
