Ministè Sante Piblik ak Popilasyon fè konnen gen 4 lòt kote pasyan ki t ap swiv tretman nan lopital Sanatoryòm yo ka ale chache medikaman.
Ministè Sante Piblik ak Popilasyon (MSPP) nan yon nòt li mete deyò jodi madi 26 septanm lan fè konnen gen 4 kote ki disponib pou malad ki t ap swiv tretman nan lopital Sanatoryòm nan Pòtoprens ale chache medikaman pou kontinye ap tretman yo. Nan fen out la, malad, doktè ak pèsonèl nan lopital sa te kouri kite l akoz bandi Gran Ravin ki te atake Kafoufèy epi kreye panik nan mitan popilasyon an.
4 kote sa yo se lopital Sen Franswad Sal ki nan ri Chareron nan Pòtoprens, lopital Raoul Pierre Louis ki nan Akachon 32 nan komin Kafou, lopital Grace Children ki nan Dèlma 31 epi Sant Sante Notre-Dame du Cap ki chita kò l nan Ri Ogé nan Petyonvil.
Depi lè atak la, sant ospitalye sa ap mal fonksyone akoz anpil moun ki dezète l met sou sa malad yo gen difikilte pou swiv tretman yo jan sa ta dwe ye, sa ki vin mete sante yo nan yon eta kritik akoz medikaman yo pa ka jwenn.
Lopital Sanatoryòm resevwa chak jou malad k ap soufri ak maladi nan poumon sitou moun ki fè tibèkiloz. Espas la gen 100 kabann epi anviwon yon santèn anplwaye.
Dekouvri plis:
