Sou demann plizyè kouch anndan sosyete a ki te mande ak sitwayen yo bat tenèb pou di non ak koze kidnapin anndan peyi a, plizyè jounalis ki t ap swiv yon fòmasyon anndan FOKAL te f on soti nan lari a bò midi epi ale bat tenèb.
Jounalis sa yo te klaksonen machin yo, genyen ki t ap bat bravo ak bat chèz, genyen ki te pran wòch epi ap frape fè ak pòt pou patisipe nan bat tenèb la. Yo te fè yon dizèn minit ap fè sa.
Konfrè yo te jwenn solidarite chofè machin ak moto ki t ap klaksonnen tou pandan yo t ap pase devan FOKAL.
Plizyè moun te kanpe bò lari a ap obsève, bat bravo tou fas ak jès jounalis sa yo. Se te anviwon yon ventèn jounalis ki te patisipe nan bat tenèb la.
Repòtè Juno7 ki te nan lari a obsève tenèb la t ap bat plizyè kote nan Pòtoprens lan, sou Dèlma, toujou nan menm lide pou di non ak kidnapin.
Dènye jou sa yo ka kidnapin nan ogmante anndan kapital la, ki pouse gouvènman an plas la pran de seri de desizyon tankou entèdi kesyon vit machin tente, yon fason pou lite kont kidnapin lan.
