Plizyè kote tankou Dèlma bloke maten an nan kapital ayisyèn lan.
Anpil kote nan kapital la leve bloke maten jedi 21 oktòb la. Kawotchou ap brile, barikad sou wout yo. Rezon an se chofè moto k ap mande otorite yo rezoud pwoblèm rate gaz la.
Repòtè Juno7 konstate sou wout Lali, Dèlma, chofè moto ki an kòlè ap boule Kawotchou akoz gaz yo pa ka jwenn nan ponp. Kèk nan yo kritike konpòtman otorite konsène yo ki pa fè anyen pou rezoud kriz sa.
Rate gaz la lakoz pa gen twòp machin sou wout yo, anpil chofè machin transpò piblik ak moto pa ka fonksyone, pri kous yo ogmante, anpil sitwayen gen difikilte pou regle aktivite yo.
Sitiyasyon sa kapab anpire pi plis akoz Asosiyasyon Chofè Pwodui Petwolye an Ayiti yo ki kanpe travay jodia poutèt koze ensekirite se sa pòt pawòl estrikti sa Jacquelin Dupré te fè konnen ak Juno7 yè mèkredi a nan kad yon entèvyou.
