Randevou
Lalin cheri
Depi douvanjou
lespri m pandye sou liy anvi
l ap tann ou,
Ti bèf mwen gentan jouke
nan joukèt plezi
bouji m rete tou limen
douvan kaporal midi
jouk fè fas kare ak jeneral minwi
Lalin cheri, m ap tann ou
Nan syèl karès
nou pral jwe marèl
solèy ak zetwèl
mèt fè jalouzi
kò n pral toupizi
Lalin cheri, m ap tann ou kounye a !
Nan yon eskonbrit
kandjanwou anba lonbrit
nou pral trese riban bonè
youn pou lòt n ap keyi flè dizè
sou nyaj lanmou kòkòy
kote tout branch pawòl paranòy
Lalin cheri, m ap tann ou kounye a nan fant janm kè m.
ZO Mangay Vanyan
[views]
