Premye minis Garry Conille anonse sou kont X li, gouvènman li an nan lide pou prepare rantre lekòl la ap bay 261 mil paran 20 mil goud pou rantre lekòl la.
Premye minis Garry Conille nan yon mesaj li pataje sou kont X li ayè madi 20 dawout 2024, pataje proyorite gouvènman li an ki se sektè sosyal la. Chèf gouvènman an fè konnen ekip li ap prepare rantre lekòl la pou soulaje paran yo. Nan sans la, li pwomèt gouvènman an ap bay 261 mil paran 20 000 goud pou rantre lekòl la. Gen plizyè lòt pwogram tou ki pou ouvriye ak fanm ki nan Bezwen.
« Pandan n ap vanse sou dosye sekirite a, Gouvènman an ap travay sou chantye sosyal yo. Konsa Gouvènman an ak patnè li yo ap prepare rantre lekòl la pou soulaje paran, ranfòse pwogram pou kwape grangou, ankadre moun ki kite kay yo, soutni ouvriye ak gwoup fanm, tifi ki pi vilnerab yo », se sa li ekri sou kont X li.
Nan yon tablo ki akonpaye mesaj la, gouvènman an fè konnen 261 mil paran pral resevwa 20 mil goud pou rantre lekòl la, 2 milyon elèv ap resevwa liv gratis tou pou ane akademik 2024-2025 lan.
Nan lòt priyorite gouvènman an, gouvènman an anvizaje distribiye 80 mil panye solidarite pou apeze grangou, 41 mil ouvriye ap resevwa 15 mil goud, 28 960 fanm ki nan bezwen ap jwenn 20 mil goud.
Desizyon sa selon gouvènman an se pou soutni plis moun ki nan bezwen. Pou sa 12.133.101.935.²⁹ goud disponib pou reyalize pwogram sila yo.
À lire aussi:
