Si mizik toujou konsidere tankou yon biznis pou moun viv, anpil atis kit lokal oubyen etranje toujou anbrase lòt chan nan biznis lan pou pèmèt yo rantre plis epi viv pi byen ak ranje chita yo.
Se nan sans sa, nou toujou wè atis yo renmen kreye pwòp liy vètman yo, patenè nan lòt biznis oubyen achte aksyon tou, yon fason pou pèmèt yo ogmante kapital ekonomik yo.
Pa bò lakay, atis Roody Roodboy ke dènyeman yon ensidan te rive l Okay, anonse jodi mèkredi 13 janvye 2020 an, sou kont Twitè l ke ane sa l ap pare pou soti 2 kas.
Anndan twit sa ke l fè a 10 zè 15 maten an, li te kòmanse pou l di ak fanatik li yo ke l pa sèlman yon senp anbasadè Joker Electronic, men l se yon patenè nan biznis lan tou.
Chantè mizik “M pa kyè” a te kontinye pou l di l ap soti 2 kas ane a k ap pote non “Roodboy1 ak Roodboy2″. Pandan l te pwofite di ke l konte sou sipò tout moun pou nouvo avanti sa.
Konsène a pa bay twòp detay sou lè pwodui sa yo ap soti, toutfwa li fè konnen plis detay ap vini nan jou yo la.
Roody se pa sèl atis ayisyen ki deside mete pwodui deyò. Nou ka site atis Izolan ak izobox, Rutshelle ki gen RGLux Beauty ak plizyè lòt atis ankò ki pa sèlman fè mizik pou viv men ki anbrase lòt domèn tou.
Dekouvri plis:
Komemorasyon 11 lane goudougoudou: BSEIPH òganize yon fòmasyon sou aksè a yon anviwònman bati
