Ti Gwav: Yon dife lakoz 4 kay brile, yon moun mouri.
Nan Ri « La Justice » ki nan Ti Gwav, yon kay ki twouve l nan zòn sa boule. Rezon ki ta lakoz sa, anndan kay sa yo konn estoke ak vann gazolin, daprè sa jounalis Guyto Mathieu fè konnen.
Dife sa koumanse pran nan kay la bò 9 è jodi madi 21 septanm lan, akoz absans ponpye dife sa te pwopaje arive boule twa lòt kay ki te kole kole ak kay ki te estoke gazolin yo.
Yon sitwayen ki rele Evens, se sou non sa tout moun konnen li, arive mouri brile pandan dife sa te eklate a. Yo jwenn sitwayen an anndan kay la. Selon sa konfrè a rapòte, sitwayen sa se yon machann gaz.
Si 4 kay arive brile pandan dife sa, gen lòt dega dife a koze paske li detwi bagay materyèl moun yo te genyen anndan kay sa yo ki ravaje pa dife a.
Kèk sitwayen ki t ap pale ak konfrè Guyto Mathieu lage responsabilite a sou do Leta yo di ki pa pran okenn mezi pou entèdi moun estoke ak vann gaz lakay yo ki se yon eleman nesesè men ki danje.
Se pa premye fwa kesyon gaz moun ap estoke ap mete dife nan kay epi fè viktim. Se yon sitiyasyon ki toujou lage rèl lakay anpil sitwayen, malgre sa pratik la toujou kontinye anba je otorite konsène yo.
N ap souliye tou ke dife sa se pa ponpye ki te vin etenn li, se popilasyon zòn lan ki te gonfle ponyèt yo pou limite dega dife a te ka fè plis.
Dekouvri plis:
SDP mande pou otorite amerikèn yo kanpe sou rapatriman ayisyen yo
