Vijilans wouj sou tout peyi a, tout dènye detay sou ouragan Elsa ki menase pase sou gran Sid Dayiti
Sizyèm bilten espesyal ki sòti pou enfòme popilasyon an sou pasaj siklòn Elsa, fè konnen se vilijans wouj nan plan nasyonal jesyon risk ak dezas la, pandan ke yè vilijans lan te jòn.
Bò 5 è maten an, ouragan Elsa te lokalize l 16.2 degre altitid nò epi 69.0 degre lonjitid lwès. Anviwon 310 km Ès/Sidès zile Beyata, an RepiblikDominikèn a 408 km de Pòtoprens, a 330 km Ès/Sidès Ansapit.
Van ki akonpaye siklòn sa se 130 kilomèt lè. Deplasman li rapid. Presyon minimal li se 998 ekto Paskal, selon tout dènye detay yo nan bilan meteyowolojik peyi a.
Ouragan Elsa toujou rete nan kategori 1, li ap rapwoche l de peyi a, li yon ti jan afebli, men li ta dwe pase tou prè Sid peyi a nan aprèmidi an ak aswè a.
Pasaj Elsa sou peyi a ka pote 100 a 159 milimèt kantite lapli nan plèn yo, men pou mòn yo anviwon 200 milimèt lapli. lanmè a kapab kite kote l konn ye a pou rive atè akoz van yo. Kapab gen gwo inondasyon tou.
Vòl ak anbakasyon ki konn fèt sou rejyon Sid peyi an entèdi jiska nouvèl lòd.
Direksyon Pwoteksyon Sivil mande ak popilasyon an rete vijilan, tande tout bilten yo, aplike konsiy otorite yo, mete tout sa k enpòtan yon kote ki sekirize, mete manje lakay nou, pa kanpe anba pye bwa, ni bò fenèt.
