Yon lòt 7 tou palè nasyonal anonse ankò

Abel Loreston melanje ak kèk lòt militan anonse nan mikwo laprès yon lòt 7 tou palè nasyonal k ap fèt demen mèkredi 14 avril la, nan objektif pou chase Jovenel Moïse sou pouvwa a.

Òganizatè yo fè konnen 7 tou palè sa se pou chase move lespri ki kenbe Jovenel Moïse ke manda l bout depi 7 fevriye pase a epi ki toujou sou pouvwa a epi pwofite denonse diktati, mizè, ensekirite, kidnapin, yo estime ki blayi anndan peyi a depi kèk tan.

Nan sans sa, militan yo ki pa sispann mobilize depi kèk lane bay popilasyon ayisyèn lan randevou demen maten sou plas konstitisyon an pou ale fè 7 tou palè nasyonal.

Militan yo menm swete vizite Jovenel Moïse anndan palè a apre 7 tou a, selon sa yo di.

N ap raple w 8 avril pase a, kèk grenn militan te fè 7 tou palè nasyonal toujou nan menm objektif la epi boule kawotchou pandan 7 tou sa t ap fèt. Yon mouvman ki te dewoule san gwo ensidan.

Si premye 7 tou a pa t gen twòp moun, fwa sa òganizatè yo espere wè plis moun vin nan mouvman an yon fason pou bay plis jarèt ak mobilizasyon an.

Dekouvri plis:

Haiti: L’essentiel de l’actualité du mardi 13 avril 2021